Segon lo ministèri public de Düsseldorf, lo copilòt del vòl de Germanwings, Andreas Lubitz, aviá un comjat per malautiá e deviá seguir un tractament, mas o amaguèt per contunhar de trabalhar. Dins los furns a son domicili, los enquestaires an trobat de documents estripats que demostrarián que Lubitz aviá una malautiá diagnosticada per un mètge e que deviá seguir un tractament. “Lo fach que demièg los documents localizats i aguèsse de certificats d’incapacitat de trabalh estripats, actuals e pel jorn de l’accident, nos fa avalorar provisòriament que lo mòrt amagava sa malautiá a l’entrepresa”, çò ditz lo comunicat del procuraire de Düsseldorf, qu’apond qu’an pas trobat cap de nòta de suicidi ni de ligams terroristas.
 
De son costat, Carsten Spohr, president de Lufthansa —la societat maire de Germanwings— aviá assegurat dimècres que Lubitz aviá reüssit “al cent del cent totas las espròvas medicalas e psicologicas” e qu’aviá una actitud impecabla. “Seleccionam amb grand suènh los nòstres pilòts e ensajam de metre l’accent sus lor capacitat psicologica abans que pòscan prene lo comandament d’un avion”, çò expliquèt. Admetèt que lo copilòt aviá interromput la formacion en 2009 pendent qualques meses per de causas qu’esclarziguèt pas, mas diguèt qu’aquò èra “abitual” e qu’abans de reprene los estudis aviá tornat reüssir los examens medicals e psicologics.
 
Lo jornal alemand Bild a publicat que Lubitz, segon son istòria medicala, aviá subit en 2009 “de depressions e d’atacs d’angoissa” que l’obliguèron d’interrompre sa formacion de pilòt. Bild assegura que lo centre aeromedical de Lufthansa aviá avertit l’Ofici Federal de l’Aviacion (Luftfahrt Bundesamt) per l’assabentar que Lubitz aviá agut un “episòdi depressiu prigond mas descreissent”. En mai d’aquò, segon The Times, Lufthansa sabiá qu’a l’ora d’ara Lubitz patissiá una “crisi dins sa vida personala”.