Segon nòstres confraires de La Dépêche du Midi, dimars 24 de març, Kedidja, de 29 ans, una musulmana maridada que pòrta un cairat per s’escondre lo pel, veniá de menar sas filhas a l’escòla quand rescontrèt per carrièras dos jovenòmes. Un d’eles l’agafèt als cabels, tirèt sus son cairat, la getèt pel sòl e, en tot l’insultar, li cridèt: “Pas aquò en cò nòstre!” Puèi la turtèt mai d’un còp e, segon lo marit de Kedidja, Mounir, de 33 ans, auriá quitament sortit un cotèl que faguèt pas servir, per astre, bensai perque lo companh de l’agressor li n’empediguèt, en tot li far observar que la victima èra prens. Los dos jovenòmes abandonèron Kedidja, que los pompièrs puèi menèron a la clinica Ambroise Paré. Son nenon, qu’a de nàisser per mièg abril, sembla d’èsser en bona santat e fòra dangièr.

I aguèt pas, çò sembla, nat testimòni dirècte de l’agression. L’endeman, un enquestaire de la seguretat departamentala ausiguèt pendent doas oras la jove femna, que faguèt sa denóncia, e lo policièr dobta pas de la bona fe de l’agredida ni del caractèr racista e islamofòb de l’agression.

Mentre que lo marit, Mounir, ditz que sa molhèr es restada fòrça chocada, e mentre que la polícia es en cèrca de l’agressor, protèstan de personalitats oficialas: lo ministre de l’Interior francés, Bernard Cazeneuve; lo deputat socialista de la Nauta Garona, Christophe Borgel; lo primièr secretari del Partit Socialista, Jean-Christophe Cambadélis. Tanben lo pòrtavotz del Conselh Regional del Culte Musulman, Abdellatif Mellouki, exprimiguèt son chepic davant la pojada dels actes islamofòbs e condemnèt “lo discors tengut, aquestes jorns, per de professionals de l’amalgama e del subredire”.