Dissabte passat, a Montréal, lo movement islamofòb Pegida cridèt a la primièra mobilizacion dins lo continent american d’aquel movement racista nascut en Alemanha. Mas foguèt pas possible gràcias a la contramanifestacion del collectiu nomenat Degun es Illegal, que despassèt largament la de Pegida. De centenats de personas participèron a una manifestacion per las carrièras de la capitala economica quebequesa contra lo movement islamofòb, que fin finala deguèt renonciar a son passacarrièra previst dins lo quartièr conegut coma Le Petit Maghreb (“Lo Pichon Magrèb”).
 
Pegida Quebèc aviá cridat a manifestar pels rets socials dins aquel quartièr que i demòran un grand nombre de personas d’origina nòrd-africana, mas solament un dotzenat de personas respondèron a la crida. Aquel dotzenat de manifestants racistas foguèron entornejats sul pic per cinc cents manifestants antiracistas amb de bandièras que disián “Destrugam Pegida! Contra los nazis”. La polícia separèt de contunh los dos grops de manifestants.