Los principals partits politics amb las associacions independentistas de Catalonha signèron diluns passat un document que marca lo fuèlh de rota de seguir per arribar a la plena independéncia del país, dètz e uèch meses après l’eleccion plebiscitària del 27 de setembre que ven. A l’ora d’ara an signat aquel document Convergéncia Democratica de Catalonha (CDC), Rassemblament (Reagruapament), Esquèrra Republicana de Catalonha (ÈRC), l’Assemblada Nacionala Catalana (ANC), l’Associacion dels Municipis per l’Independéncia (AMI) e Omnium Cultural. La Candidatura d’Unitat Populara (CUP) tanben a manifestat son intencion d’aderir al fuèlh de rota e mai se se mòstra pas d’acòrdi amb qualque ponch del document.
 
 
Lo fuèlh de rota
 
Lo document prevei que l’eleccion al parlament autonomic de Catalonha e Aran, anonciada pel 27 de setembre que ven, venga un plebiscit. Los partits independentistas metràn coma primièr ponch de lor programa la proclamacion de l’independéncia de Catalonha e Aran. Aital, lo resultat del vòte se poirà interpretar, sens la mendre dobtança, coma lo referendum d’independéncia que l’estat espanhòl a pas permés. Los partits s’engatjan tanplan a sonhar lo costat social de la politica, “indestriabla de çò nacional”, mai que mai tocant la santat, l’educacion, las pensions, los dreches socials e los servicis publics essencials.
 
Acabada l’eleccion, los signataris se son engatjats a començar un procès per proclamar l’independéncia del país en 18 meses. Pendent los 10 primièrs meses, se redigirà la Constitucion de Catalonha e Aran, per mejan de mecanismes participatius e d’un procès dobèrt als ciutadans. Se crearà las estructuras d’estat necessàrias, coma lo tresaur public, la seguretat sociala, l’accion exteriora, la transicion de las infrastructuras de l’energia, los servicis socials, la santat, lo provesiment d’energia, la seguretat...
 
Se començarà las negociacions amb l’estat espanhòl sul repartiment de la riquesa e lo deute; e amb las institucions internacionalas, sus la reconeissença e l’admission del novèl estat.
 
A la fin d’aquel procès, se debanarà un referendum vinculant sus la constitucion del novèl estat. Se lo resultat es positiu, se proclamarà l’independéncia e se convocarà d’eleccions al Parlament dins lo novèl encastre constitucional. Tre aquel moment, se negociarà las relacions amb l’estat espanhòl e l’Union Europèa.
 
 
Reaccions de l’espanholisme
 
La signatura d’aquel document a mes tornarmai en evidéncia la tendéncia de las fòrças independentistas a convergir e cercar de ponches en comun, mas tanben la belligerància de l’espanholisme.
 
Dins aquel sens, lo president espanhòl, Mariano Rajoy, a mes a trabalhar los avocats de l’estat per analisar un eventual procès judiciari contra los signataris del document. Segon Rajoy, lo document “va contra lo destin de l’istòria” e, en mai d’aquò, es contra “las leis que i a a l’ora d’ara en Espanha e contra la Constitucion”.
 
De son costat, lo cap catalan del Partit Socialista, Miquel Iceta, diguèt a Catalonha Ràdio que vesiá los signataris del document sus lo “camin de la preson”, mentre que parlava de la possibilitat d’una “petita guèrra”.