E mai se s’anoncièt en genièr, Palestina venguèt ièr formalament un membre de la Cort Penala Internacionala (CPI), qu’a son sèti a l’Aia (Païses Basses).
 
Es previst qu’una de las primièras denóncias de Palestina se farà contra l’estat d’Israèl per de crimes de guèrra comeses dins l’atac contra Gaza l’estiu passat e mai per la politica d’installacion dels colons israelians en Cisjordania.
 
Las relacions entre Palestina e l’estat d’Israèl auràn, tre ara, un resultat imprevisible. Al començament de genièr lo primièr ministre israelian reagiguèt contra la decision de Palestina en blocant lo pagament mai de 100 milions d’èuros. Segon Netanyahu, lo govèrn palestinian dinamitava las opcions del procès de patz. Ara, una de las questions màgers es: que se pòt passar se los dirigents israelians, amb lor primièr ministre Benjamin Netanyahu, refusan de comparéisser a l’Aia? Cal remembrar qu’Israèl fa pas partida de la CPI.
 
A la fin de 2014, Palestina decidiguèt de demandar d’intrar a la CPI. La CPI a la tòca d’enseguir los autors de genocidis, de crimes contra l’umanitat e de crimes de guèrra dins lo Mond entièr. Aquela demanda palestiniana seguissiá lo refús del Conselh de Seguretat de l’ÒNU de metre fin a l’ocupacion dels Territòris Palestinians en tres ans. Alavetz, la demanda d’adesion a la CPI del president palestinian Mahmud Abbas foguèt recebuda rapidament pel secretari general de l’ÒNU, Ban Gimun (Ban Ki Moon), qu’anoncièt en genièr que Palestina passariá d’estat observaire de la CPI a estat membre a partir del 1r d’abril de 2015, valent a dire ièr.