Lo president de Lufthansa, Carsten Spohr, diguèt ièr dimècres a Sèina (o Sanha, Prealps de Dinha) que, e mai se la companhiá sap mai de causas cada jorn, se demorarà “longtemps” per saber las causas de la tragèdia del vòl de Germanwings que, lo 24 de març passat, s’escrachèt sul Pueg dels Tres Evescats. “Pas un jorn se passa sens que pensem a aqueste accident terrible”, çò assegurèt Spohr, acompanhat pel president de Germanwings, Thomas Winkelmann. Spohr tornèt plànher lo dòl a las familhas e als amics de las victimas e diguèt sos grandmercés per lo “prètzfach extraordinari” e mai “la professionalitat, energia, empatia e simpatia” de las còlas de salvament, dels gendarmas e dels mètges que trabalhan sus plaça e, tanben, del personal que trabalha a Barcelona, Marselha e Düsseldorf.
 
Spohr mercegèt tanben lo mond del país, e assegurèt qu’èra conscient de çò que tot aquò representa per eles, perque “cap de 24 de març serà pas pus parièr”. “Farem tot çò que serà possible per qu’aqueste endrech siá de dòl per las familhas e pels amics de las victimas e per recuperar aquesta zòna tan polida un còp l’enquèsta conclusa”, çò apondèt lo president de Lufthansa.
 
Après reïterar son dòl, Spohr planguèt qu’aquela tragèdia se foguèsse producha amb una companhiá coma Lufthansa, pr’amor que se son totjorn centrats sus la seguretat. “Demandam perdon per las pèrdas causadas, i a pas de mots que pòscan exprimir aquò”, çò diguèt.
 
Spohr e Winkelmann compareguèron davant los mèdias sens acceptar que los jornalistas lor pausèsson de questions.