Un an après sa barradura, lo sit de cogeneracion de Les (Val d’Aran) se torna dobrir. Lo nòu grop Sandton a renovelat lo contracte pels 27 salariats que riscavan d’anar al caumatge. Sandton crompèt en decembre passat las nòu centralas de cogeneracion del Neolectra que barrèron, dont la d’Aran, que torna engatjar totes los salariats.
 
Lo sit de Les gerit per Neoelectra deguèt barrar fa un an a causa de la reforma energica del govèrn espanhòl, qu’eliminèt las primas a la cogeneracion, es a dire, de profechar de l’energia termica venent de la produccion d’energia electrica. Sens aquela bonificacion, lo sit de Les se podiá pas manténer. Lo sit es un pargue industrial ecologic de tres entrepresas que se completan per fornir las matèrias primièras e per eliminar los residús. La centrala de cogeneracion produtz d’electricitat mejançant la combustion de gas; aquò produtz d’aiga cauda que s’emplega per climatizar las piscinas dels esturions de la societat de caviar Nacarii. Aquò crèa lo dioxid de carbòni (CO₂) que se met en botelha e que se vend per elaborar de bevendas gasosas.
 
 
Satisfaccion del govèrn d’Aran
 
Lo sindic d’Aran, Carlos Barrera, a manifestat sa satisfaccion qu’es “merit de toti es implicadi e deth Conselh Generau d’Aran per collaborar ena redubertura dera fabrica de cogeneracion de Les e de totes es activitats restacades”. “Aguest ère un objectiu desirat per toti”, çò a apondut lo sindic, en soslinhant qu’“era Val d’Aran arrecupère ua activitat economica e s’estabilizen es lòcs de trabalh de tot eth personau”.
 
 
Un an de manifestacions
 
Pendent tota l’annada se son debanadas en Aran e endacòm mai de protèstas qu’an comptat amb lo sosten del Govèrn d’Aran e de l’oposicion. Aquelas protèstas s’acompanhavan d’accions e de reünions per obténer la redobertura del sit.