S’es mes en examen quatre escolans d’un licèu militar dins la banlèga rica de Grenòble (Arpitània), que projectavan d’atemptar contra una mosqueta a Montelaimar (Vaudaina), segon çò que rapòrta Le Dauphiné Libéré. Sembla qu’avián començat a reünir de material e que s’èran informats sul procès de fabricacion d’explosius.
 
Los furns e mai la presa dels ordenadors e dels telefòns mobils dels liceans an permés de determinar que, “e mai s’èran luènh d’èsser en capacitat de passar a l’acte, avián avançat seriosament lor projècte”, çò a indicat una font judiciària a Le Dauphiné Libéré.
 
Un dels adolescents, originari de Montelaimar, auriá projectat dempuèi la rintrada escolara d’atacar la mosqueta de sa vila, en evocant una rumor que cèrts fidèls serián “partits faire lo jihad”. Son de rumors e de prepauses “consternants” per Adb Al Qader Bendidi, president del conselh regional del culte musulman. “Lo novèl imam arribèc fa dos mes, ven d’Argeria dins lo quadre de la cooperacion francoargeriana enquadrada per la federacion de la mosqueta de París”, çò a explicat Bendidi a Libération.
 
Los liceans, de 16 e 17 ans, son estats excluses “a títol conservatòri” de lor institucion escolara e militara. “L’armada de l’aire es escandalizada”, çò declarèt lo coronèl Jean-Pascal Breton, del Servici d’Informacion e Relacions Publicas de l’Armada de l’Aire (SIRPA). En mai d’aquò, lo SIRPA a raportat qu’es pauc probable qu’aqueles quatre adolescents reprengan lor escolaritat. L’armada es estada mai clara: es fòra question que tornen.