Lo grop de television ATR quita d’emetre après que las autoritats federalas l’ajan pas enregistrat jos la lei russa. L’entitat encargada de supervisar lo sistèma mediatic rus ditz que se tracta d’una decision tecnica. Los mèdias tatars e la maximala organizacion politica dels tatars parlan de persecucion. Amnestia Internacionala considèra que l’objectiu es d’“intimidar” la comunautat tatara.

La Federacion Russa a barrat divèrses mèdias de Crimèa, en i comprenent la television ATR, la principala qu’emetiá en lenga tatara de Crimèa. Las autoritats russas dison que se tracta d’una decision tecnica, mas los mèdias tatars parlan de persecucion politica.
 
Lo Cremlin afirma que la decision de barrar aqueles canals l’a pas presa la presidéncia russa, mas l’organisme federal encargat de supervisar los mèdias, Roskomnadzor. El assegura que los mèdias tatars —qu’operavan fins ara amb de licéncias ucraïnesas— an pas completat lo procès d’enregistrament jos las leis de Russia abans de la fin del relambi, qu’èra lo 1r d’abril, e que doncas seriá estat illegal que contunhèsson d’emetre.
 
Mas los mèdias tatars, Amnestia Internacionala e la maximala organizacion politica dels tatars de Crimèa, lo Qurultay, afirman que los mèdias tatars si qu’an presentat tota la documentacion per s’enregistrar, e qu’aquela cambada es estada entrepachada o ignorada. Los mèdias tatars pensan qu’es una decision arbitrària, destinada a penalizar la comunautat tatara e a silenciar los mèdias critics amb lo Cremlin. Amnestia Internacionala parla d’“atac sens vergonha contra la libertat d’expression, mascat de procedura administrativa”, e ditz que l’objectiu es d’“intimidar la comunautat tatara crimeana”.
 
ATR operava dempuèi nòus ans e aviá divèrses canals de ràdio e television, en i comprenent un per enfants. Emetiá en tatar, en rus e en ucraïnés. Lo sieu proprietari, Lenur Islamov, ditz qu’ensajaràn de redobrir los canals a travèrs d’autras vias —lo satellit o Internet ne poirián èsser doas—. Islamov a denonciat que l’an menaçat de li expropriar lo canal s’arrestava pas las emissions lo 1r d’abril.
 
Un autre dels mèdias qu’a pas recebut l’autorizacion d’enregistrament de la part de Russia es l’agéncia d’informacions QHA, qu’ofrís de contenguts en rus, anglés e turc dempuèi un vejaire tatar. A l’ora d’ara, QHA —que dispausa d’un domeni ucraïnés, e non rus— contunha de publicar de nòvas.
 
 
Aksionov Acusa ATR de “daissar de costat” la populacion
 
Lo primièr ministre de Crimèa, Sergei Aksionov, a acusat ATR d’afrontar las autoritats crimeanas e de “daissar de costat” la populacion de Crimèa amb l’idèa que la peninsula “tornarà en Ucraïna qualque jorn”.
 
Crimèa foguèt annexada en març de 2014 per Russia après un referendum qu’Ucraïna, los caps tatars e las poténcias occidentalas considèran qu’aguèt pas de garentidas democraticas.
 
 
 
 

---

Aquesta nòva es adaptada de Nationalia amb qui Jornalet a un acòrdi de cooperacion