Willy Selten, lo grossista neerlandés qu’aviá vendut de carn de caval etiquetada “pur buòu”, e qu’es al centre d’un dels escandals alimentaris mai grands d’Euròpa, es estat condemnat a dos ans e mièg de preson per un tribunal dels Païses Baisses, segon çò que rapòrta L’Indépendant.
 
L’an reconegut colpable d’aver, “coma director de doas societats, falsificat de facturas, d’etiquetas e de declaracions escrichas e mai d’aver emplegat de documents falses pel comèrci de la carn”, segon de fonts judiciàrias citadas per aquel jornal. Lo ministèri public demandava 45 ans de preson, del temps que la defensa afirmava que la carn de caval se trobava per error dins de lòts venduts en Euròpa.
 
 
Spanghero, una societat occitana al còr de l’escandal
 
L’escandal de la carn de caval esclatèt en 2013 en Irlanda e la Grand Bretanha, quand descobriguèron de carn equina dins qualques hamburgers congelats de la cadena Tesco. Aquò impliquèt tota la cadena del comèrci alimentari europèu dont lo negociant de Castèlnòu d’Arri (Lauragués), Spanghero, qu’après qualques annadas de dificultats a causa d’aquel escandal ara se nomena La Lauraguesa.
 
Al delà de la societat lauraguesa, l’escandal toquèt las entrepresas Doly-Com, Draap Trading Ltd., Comigel e una seguida de marcas coma Panzani, William Saurin, Nestlé, Aldi, Carrefour, Picard Surgelés, Buitoni, etc. De provesidors e fabricants de plats preparats a basa de carn bovina i metián de carn de caval, mens cara, dins de produches etiquetats d’èsser de buòu al 100%.
 
En decembre de 2013 la polícia detenguèt 21 personas en Occitània dins una operacion que se debanèt dins 11 departaments de Lengadòc e de Provença, amb la participacion d’un centenat de gendarmas.
 
En novembre de 2014, l’enquèsta s’acabèt amb la mesa en examen de quatre personas, dont dos responsables de la societat lauraguesa, Spanghero.