Edward Snowden, lo consultor tecnologic refugiat a Moscòu dempuèi mai d’un an per aver filtrat de milièrs de documents de l’Agéncia de Seguretat Nacionala dels Estats Units (NSA), a agut pendent qualques oras un monument a Nòva York. Lo bust d’Snowden apareguèt diluns après qu’un grop d’artistas lo placèsse, d’escondons, dins lo pargue de Fort Greene de Brooklin, a Nòva York, ont ja i a un memorial consagrat als onze mila presonièrs que moriguèron dins los vaissèls britanics durant la Guèrra de l’Independéncia dels Estats Units (1775-1783).
 
Lo grop d’artistas, abilhats de vestits reflectors, passèt tota la nuèch en installant lo monument dins aquel endrech e, doncas, en lo restacant simbolicament als primièrs estatsunidencs que perdèron la vida per la libertat de lor país fa aperaquí dos cents ans.
 
E mai se los artistas an demandat a las autoritats nòvayorkesas de manténer l’òbra, lo monument foguèt retirat qualques oras puèi.
 
Dins lo vidèo que seguís, podètz veire lo procès de construccion de l’òbra e de l’installacion nocturna.