Dimars passat publicàvem lo documentari de Vilaweb TV a prepaus del futur d’Aran dins la perspectiva de l’independéncia de Catalonha. Ara, los confraires del servici d’informacion audiovisuala d’aquel mèdia catalan an publicat un documentari sus la situacion de la lenga occitana, de l’ensenhament, dels mèdias e sus l’orizont qu’ofrís l’Institut d’Estudis Araneses-Acadèmia Aranesa de la Lenga Occitana (IEA). Parlan amb d’institucions, de partits e la societat d’Aran e tanben amb de representants del Congrès Permanent de la Lenga Occitana (CPLO) e de l’Acadèmia Occitana-Consistòri del Gai Saber (AOCGS).
 
E mai se la lenga es mai protegida que jamai, l’occitan en Aran pèrd de parlants cada jorn en tot se far remplaçar per l’espanhòl. Segon lo darrièr sondatge de la Generalitat de Catalonha, de 2013, sonque lo 18% dels araneses emplegan abitualament la lenga del país. Dins los ans 1930, aquel nombre èra d’aperaquí un 70%. Pasmens, las chifras càmbian s’òm mesura la coneissença de la lenga: tre que l’occitan es lenga veïculara de l’educacion, tot jove educat en Aran es capable d’escriure e de parlar pro corrèctament en aranés.
 
Lo reportatge analisa la situacion dins la rèsta d’Occitània a prepaus de l’educacion, los mèdias, la situacion politica e las eventualas mesuras de prene per recuperar la lenga, en Aran en particular e en Occitània en general.
 


L'Aran tem per la llenguaper vilawebtv