Lo mèl de Cevenas es ara dins la lista de las apelacions d’origina protegida (AOP) e de las indicacions geograficas protegidas (IGP). La Comission Europèa n’a aprovat la demanda d’enregistrament, amassa amb l’espèuta de Francònia, en Alemanha, segon çò que rapòrta La Setmana.
 
Lo mèl de Cevenas totjorn a fach partida de la vida vidanta dels cevenòls e, per tant, es vengut un produch emblematic e qualitós. Tradicionalament cada fogal possedissiá un bornat, nomenat brusc en occitan cevenòl, fach amb un tronc de castanhièr e cobèrt amb una lausa.
 
A l’ora d’ara, los brusques tradicionals son de mai en mai remplaçats pels brusques abituals e contribuisson al relanç de l’apicultura al país. Es un país, qu’après aver patit una crisi rurala, ensaja de tornar viure dins son economia tradicionala. Son los apicultors, units a l’entorn de l’Agropament Qualitat dels Mèls de Lengadòc-Rosselhon, qu’an revendicat aquela IGP pel mèl de Cevenas, amb la tòca de garentir l’apicultura al país, de valorizar aquel produch del terraire e sustot de protegir la denominacion.