Dempuèi lo 28 de genièr, l’activista independentista savoiard Fabrice Dugerdil èra detengut dins la preson francesa de Bônavela. Ne sortiguèt dimars 7 d’abril de matin. Oficialament li èra reprochat d’aver circulat amb una veitura que portava de placas d’immatriculacion savoiardas e d’aver refusat de mostrar sa carta d’identitat francesa. Per insomission a la justícia de l’estat francés, aviá refusat de pagar las multas relativas a aquestes actes. Amb una severitat inedita, l’encarcerèron pendent dos meses e mièg dins de condicions qu’assimilan Fabrice Dugerdil a las d’un presonièr politic. Visiblament la justícia sembla d’aver volgut tustar e punir pesugament lo militantisme independentista puslèu que la banala infraccion al còde viari.
 
Un fòrt movement de solidaritat internacionala s’organizèt a l’entorn de la detencion de l’activista. De Bretanha, Cabilia, Occitània e Piemont de voses se faguèron ausir per sosténer l’independentista e sa familha. L’organizacion internacionala UNPO (Organizacion de las Nacions e dels Pòbles Non-Representats) permetèt de portar una amplor mondiala a un empresonament que jutjan politic.
 
En Fabrice Dugerdil sortiguèt de preson amb un vam e un estrambòrd fora comun. A declarat als jornalistas de Le Dauphiné Liberé: “França a mostrat son enveja de me far calar sens portar pròva de sa proprietat juridica de Savòia. Contunham sens nos descorar”. L’avocat dels Bonets Roges (Bonedoù Ruz) bretons, Yann Choucq, desenant, defendrà Fabrice Dugerdil dins son combat juridic contra l’estat francés que segon el ocupa illegalament Savòia.
 
 
 
 
TL