Lo Conselh d’Estat donèt rason, ièr, dimars, a GDF Suez en anullant lo decret de setembre de 2011 qu’aviá gelat las tarifas del gas. Çò qu’impausa al govèrn de revisar retroactivament las tarifas aplicadas pel periòde anant del 1r d’octòbre de 2011 al 1r de genièr de 2012.

Aquela auça de tarifas poiriá arribar a 10%. Segon los calculs porgits per la Comission de Regulation de l’Energia (CRE), l’auça repercutiriá l’aument dels còstes de provesiment en gas natural de GDF Suez.
 
Aquela decision arriba mentre que lo govèrn aviá anonciat, diluns 9 de julhet, que limitariá l’auça de las tarifas del gas e de l’electricitat per “preservar lo poder de crompa dels ostals franceses”. L’auça se deviá limitar a l’inflacion estimada a 2%. Lo primièr ministre, Jean-Marc Ayrault, o aviá martelat sus la scèna del jornal televisat de 20h de TF1: “Vos disi que s’aumentarà pas lo prètz del gas de 5%. Es pas question d’aumentar lo prètz del gas mai que l’inflacion”. Lo ministre del Budget, Jérôme Cahuzac, pensava quitament de modificar la lei per limitar l’auça de las tarifas del gas.