Lo govèrn de la Generalitat de Catalonha a prepausat dimècres passat a Tolosa de bastir un ret regional de trens que jonga Catalonha e Lengadòc. Segon lo conselhièr catalan del territòri, Santi Vila, aquel ret, diferent del TGV mas de largor europèa, se poiriá metre en foncionament l’an que ven e jonheriá Tolosa e Montpelhièr amb Tarragona e Lhèida.
 
La tòca es de prepausar un servici regular de trens regionals que connècte las vilas lengadocianas de Tolosa, Carcassona, Narbona, Besièrs e Montpelhièr amb las vilas catalanas de Perpinhan, Figueres, Girona, Barcelona, Lhèida e Tarragona. Catalonha es una region ont demòran mai de sèt milions de personas.
 
Segon lo conselhièr del territòri de Catalonha, los nòus servicis favoririán las relacions culturalas, economicas e professionalas dels dos territòris. Per Vila, la configuracion del servici de nauta velocitat fa impossiblas las relacions eficientas e regularas entre los dos païses, perque devon èsser totjorn subordenadas a las bassas frequéncias oràrias dels trens e a d’oraris non adaptats als besonhs dels ciutadans, coma o son pas brica los prèses de las bilhetas.
 
“Cresi que l’estudi de mercat pòt culminar ongan, sens dificultats, e lo servici se poiriá implementar a partir de l’an que ven”, çò avancèt lo conselhièr catalan. E mai se las regions serián elas encargadas de metre en marcha e de gerir los nòus servicis regionals, la Generalitat de Catalonha afirma que cal l’implicacion e l’engatjament dels govèrns espanhòl e francés per que l’idèa pòsca prosperar e, sustot, per facilitar la cambada administrativa.
 
A l’encòp, soslinhan qu’es previst que se liberalizen puèi las linhas ferroviàrias de granda velocitat. Aquel fach que poiriá ajudar a complir lo projècte. Segon Vila, una autra opcion seriá un acòrdi de cooperacion entre l’SNCF e Renfe.