Raúl Castro e Barack Obama an scenificat un autre pas sul camin de la reconciliacion dels Estats Units e Cuba. Aquesta dimenjada, dins l’encastre de la Reünion de las Americas, los dos presidents se trobèron en un rescontre privat, lo primièr dempuèi lo trionf de la revolucion cubana, çò rapòrta Cuba Debate.
 
Segon Castro, los dos païses an la volontat d’avançar mas ara cal de “paciéncia”. Amb l’enveja de dialogar, lo cap cuban reconeguèt que i a “fòrça diferéncias” mas que lo dialòg se debana “amb fòrça respècte”. Castro manifestèt publicament qu’Obama es “un òme onèst”, una onestat que lo cap cuban l’atribuís a sas “originas umilas”.
 
De son costat, Obama diguèt que “los Estats Units seràn pas mai presonièrs del passat” e qualifiquèt lo rescontre d’“istoric”. Lo president estatsunidenc reconeguèt que  l’istòria entre los dos païses es “complicada”, mas faguèt una crida a “virar la pagina” e a bastir una nòva relacion. “Sèm ara dins de condicions per avançar sus lo camin cap al futur”, çò diguèt.
 
L’amassada s’acabèt sens cap d’engatjament de las doas parts. Los Estats Units an pas exclús Cuba de la lista dels païses que finançan lo terrorisme e tanpauc an pas parlat de redobrir las ambaissadas.
 
 
Lo blocatge contra Cuba es encara aplicat amb tota son intensitat
 
Castro soslinhèt qu’èra ja ora que son país foguèsse convidat a la Reünion de las Americas, en pè d’egalitat, e remembrèt que lo blocatge economic contra Cuba es encara aplicat amb tota son intensitat.