Intervenarèn Nadir Sutter, Vice President de la Società Svizzera Protezione Beni Culturali, Aurelio Heger, arqueòlog, istòric e bòn conoisseire de la cultura ebràica, Eleonora Vita che presentarè lo libre e, en mai, parlarè dal tèma curiós “divagacions linguísticas d’una anglista ebrèa-piamontesa”, lo linguista Luca Quaglia, lo recerchaire Paolo Secco, lo dialectòlog Franco Bronzat. Tuchi abo l’objectiu d’aprefondir lo tèma propongut dal libre. Un’exposicion sus aquel argument serè montaa dins la Confratèrnita de la Paròquia de Santa Maria curaa da lhi fotografs dal Cedas-Fiat e se poerè visitar per aquilhi jorns. Lo convenh se passarè dins la Sala Polivalenta ente se trobarè un’autra exposicion “W Ostana” dal paisanés Stefano Beccio, volgua da la Comuna d’Ostana per lo Filmfestival de Trento.

Entrementier arriba en plaça Piave la Carovana Balacaval que sistema lhi cars en cèrcle e dona un bèl guedo a la plaça, un pòst de “convivença” coma dison lhi occitans, “agréable” come dirion lhi francés, de “coesion sociala” a l’italiana.

Un di cars de la carovana se transforma en palc e dal jòus taquen lhi espectacles: lo grop Aire d’Ostana presenta lor cd “Onhi ase fai son vers” sus las danças de la val Pò, lo venre lhi Balacaval presenton “Lo varietat de lhi ans 20 dal tèrç millenari”, un espectacle teatral-musical sus la decreissua qu’arriba per la fin dal petròli e sus una companhia que viatja e que, per se ganhar lo pan, tira fòra lo mielh de son art; lo sande un autre cd “Perlas de veire” presentat “en prima” dal chantaire-autor Rodolo Brun. Una dròla d’estòria la sia: descuèrb son origina occitana a travèrs un percors de creissua personala liaa al sciamanésim, repilha la lenga e fai de chants de sa composicion que interpreta abo una vòutz chauda e vibranta. Mancava da temp un chantaire-autor dins la música occitana d’aqueste cant.

La diamenja lo gran final abo l’espectacle-bal “Dançar occitan en 3D”. Una novèla creacion 2012 de la Carovana Balacaval ente se polon sénter lhi vielhs sonaires tradicionals que cònton e sònon e lhi joves sonaires que reproponon las lors danças e fan balar lhi nòus balarins o argalon lhi pigre que reston setat tranquilles a escotar.

En mai qu’aquò, lo venre, lo sande e la diamenja da 10 oras a 6 oras la Chambra d’Òc propón un cors de Formacion en lenga occitana “Ven devisar”. Es una immersion linguística que vai ben per qui parla la lenga e per qui conois nhanca na paraula. Abo de conversacions, de lecturas, la vision de films, la conoissença dal territòri én prepausa un apròche a la lenga occitana que sovent es sul la poncha de la lenga a un baron de gent que l’an sentua en casa, en vir sus lhi bals, al marchat mas an pas lo coratge de la parlar.

Abo la creacion d’un espaci de tranquillitat ente tuchi se tròben a lor aise, sensa èsser pilhats en vir perque parlon ren pro ben, ren pro just coma se parla ent’un pòst o l’autre, qui es aquí pòl se desblocar e tirar fòra sensa gena lhi recòrds di lors vielhs, las paraulas qu’avia estofaas, qu’avia vuelha de salhir. Es un sistèma d’encoratjament, legier e amusant, tot lo contrari d’aquò qu’arriba dins lhi nòstri país vèrs lhi paures diauls qu’aurion vuelha de repilhar o d’emprene la lenga occitana.



Chambra d'Òc