D’activistas de la campanha Scrap Trident an blocat l’accès a la basa militara de Faslane. L’SNP promet de votar contra autrejar de nòus fonzes per manténer lo programa militar nuclear al Reialme Unit, que laboristas e conservators lo vòlon manténer.

Mai de 200 activistas bloquèron diluns passat los accèsses a la basa que l’armada britanica a a Faslane, dins la estuari de Clyde, dins l’encastre de la campanha Scrap Trident, que reclama una Escòcia sens armas nuclearas. Aquela basa aculhís lo programa Trident que s’ocupa de las armas nuclearas qu’a l’ora d’ara son de l’armada britanica. Lo movement ecologista e pacifista escocés fa de decennis que refusa la preséncia de Trident —e del sieu predecessor, Polaris—, e aquò’s una demanda que compta amb lo sosten dels partits independentistas.
 
La polícia detenguèt 36 activistas. Lo deputat del Partit Verd Escocés Patrick Harvie participèt a la protèsta e prepausèt que los salariats de la basa foguèsson reciclats per defendre “las mars del nòrd estrategicament importantas”. Sens armas nuclearas, se compren.
 
Lo blocatge de Faslane arriba en seguida d’una manifestacion a Glasgow, tanben convocada per Scrap Trident. Ailà, la primièra ministra d’Escòcia, Nicola Sturgeon, reïterèt que los deputats del Partit Nacional Escocés (SNP) que serián elegits al Parlament britanic "jamai pas sostendr[iá]n lo Trident".
 
En març de 2016, los deputats britanics deuràn votar s’autrejan los fonzes per bastir los sosmarins nuclears qu’auràn de remplaçar los actuals, nomenats Vanguard. E l’SNP a dich que, s’aquò depend de los sieus vòtes, aqueles fonzes i seràn pas jamai. La setmana passada, Sturgeon avertissiá que se los laboristas mantenguèsson lor idèa d’avançar lo programa nuclear de l’armada, i auriá pas de pache de legislatura amb lo partit laborista d’Ed Miliband. Mas los laboristas e los conservators son partisans de renonciar pas al programa nuclear, alavetz l’SNP poirà pas evitar una majoritat larga a Westminster en favor de Trident.
 
 
 
 

---

Aquesta nòva es adaptada de Nationalia, amb qui Jornalet a un acòrdi de cooperacion