Un an après lo raubament de dos cents setanta sièis dròllas dins una escòla del nòrd-èst de Nigèria, an aumentat considerablament las mobilizacions. A la capitala del país, Abuja, i a agut aquesta setmana de manifestacions reclamant que s’intensifique la pression e que lo govèrn priorize lo salvament de las escolanas raubadas. La BBC presenta lo testimoniatge d'una femna que ditz que, fa tres setmanas, vegèt vivas mai d’un cinquantenat d’aquelas filhas a Gwoza, al nòrd-èst del país. Lo president nigerian, Muhamad Buhari, a promés de far totes los esfòrces necessaris per liberar las filhas raubadas.
 
En ocasion d’aqueste trist anniversari, Amnestia Internacionala ven de publicar un rapòrt esmovent. Lo grop juhadista Boko Haram, fidèl a l’Estat Islamic, a raubat almens doas mila filhas e femnas en Nigèria dempuèi 2014, per las sometre a esclavatge sexual o per las entraïnar coma soldatas. E mai, Amnestia Internacionala calcula que Boko Haram a tuat mai de 5500 civils dins l’annada passada.
 
Segon l’UNICÈF, los “talibans negres” an obligat 800 000 enfants de fugir lors ostals a causa del conflicte al nòrd-èst de Nigèria entre Boko Haram, l’armada nigeriana e los grops d’autodefensa civila. Segon lo rapòrt, en un an s’es doblat lo nombre de menors que lor a calgut fugir. L’UNICÈF tanben denóncia que “de desenats d’enfants an desparegut en Nigèria raubats, engatjats pels grops armats, atacats, utilizats coma arma de guèrra o obligats de fugir la violéncia”. Dins aquel sens, l’organizacion internacionala planh: “Aqueles enfants an drech qu’òm lor torne lor enfança”.