Mai de dos decennis après la fin de l’apartheid, lo conflicte racial devesís encara la populacion de Sud-Africa. Un dels darrièrs endreches de protèsta es l’Universitat de Ciutat del Cap (UCT), ont lo 9 d’abril passat faguèron tombar l’estatua d’un dels simbòls del imperialisme britanic, Cecil John Rhodes. Un grop d’estudiants e de personal de l’universitat tombèron lo monument amb l’ajuda d’un camion-grua e de cadenas.
 
La casuda del monument de Rhodes a mes l’atencion sus las frustracions que denóncian los estudiants negres dins l’universitat pus prestigiosa de l’estat.
 
Las protèstas comencèron fa aperaquí un mes, quand un estudiant de sciéncias politicas, Chumani Maxwele, de trenta ans, daissèt una ferrat d’excrements umans davant lo monument, qu’èra en una posicion proeminenta al mièg del campus universitari dempuèi 1934.
 
Tres jorns après l’accion de Maxwele, i aguèt una assemblada a la pòrta de l’universitat, d’ont sortiguèt lo movement nomenat Rhodes Must Fall (Rhodes deu tombar). La difusion de la protèsta cresquèt rapidament a travèrs d’una pagina de Facebook que servís per concentrar la discussion. Lo 20 de març un grop d’estudiants e de salariats ocupèt un dels edificis administratius, qu’avián pas previst de lo quitar fins que lor demanda foguèsse escotada.
 
“Nos mobilizam per far l’accion dirècta contra lo racisme institucional de l’Universitat de Ciutat del Cap”, çò dison los del collectiu. “L’existéncia de l’estatua es solament un aspècte de l’injustícia sociala de l’UCT. La casuda de Rhodes es un simbòl de l’inevitabla casuda de la supremacia e dels privilègis dels blancs dins lo nòstre campus”, çò apondon.