Meloni cerca de sostens entre los cònsols de l’illa. Lo cònsol de Sàsser avalora l’iniciativa en favor de la “liura expression dels sardes”. Lo principal partit sarde defend una lista independentista unida per las eleccions venentas en Sardenha.

Lo refús de la region de Sardenha d’organizar un referendum d’independéncia, après que se siá amassat 27 000 signaturas qu’o demandan, a desencadenat de reaccions en defensa del drech a l’autodeterminacion de l’illa. Doddore Meloni, cap del movement independentista PARES-Malu Entu e impulsor del recuèlh de signaturas, a començat a percórrer Sardenha per s’entrevistar amb divèrses cònsols.
 
Entre los cònsols que se son entrevistats amb Meloni i a los de Posthudorra e Sàsser, al nòrd de l’illa. Lo cònsol de Sàsser, Gianfranco Ganau, a reconegut l’iniciativa de Meloni en favor de la “liura expression dels sardes” e a apondut que per el es pas una bona causa que la region refuse la convocacion del referendum perque, segon lo sieu vejaire, aquò o pòt solament far lo Tribunal Constitucional italian.
 
Lo Partit Sarde d’Accion prepausa un front independentista
 
D’autras fòrças independentistas an tanben manifestat que son decebudas pel fach que la region de Sardenha (presidida per Ugo Cappellacci, membre del partit de drecha Pòble de la Libertat) aja refusat de convocar lo referendum. La principala fòrça del nacionalisme sarde per nombre de vòtes, lo Partit Sarde d’Accion, a prepausat una aliança de tot l’independentisme per se presentar a las eleccions sardas venentas.
 
A las darrièras eleccions sardas, en 2009, los partits del nacionalisme sarde despassèron leugièrament 10% dels vòtes, en se presentant en quatre listas politicas desparièras. Un an puèi, lo vòte d’aqueles partits avancèt un pauc mai dins las eleccions provincialas.









Aqueste article ven del jornal catalan Nationalia.cat, amb qui Jornalet a un acòrdi de cooperacion.