Nascuda en 1959, a Atar, dins lo desèrt d’Adrar, en Mauritània, al sen d’una familha bigordana, Odile Cariteau s’installèt al país e mai s’es fach de residéncias artisticas en Japon, als Estats Units e en Espanha.
 
Totes aqueles viatges an donat un sens practic a la vida artistica de Cariteau. Amb sa vida, l’artista occitana ensaja de construire un pont entre los continents en evocant lo principi universal de l’òme e en mostrant dins sa pintura e sos escriches l’importància fondamentala de la natura, e mai lo ligam vertadièr que l’unís amb l’òme, segon çò que l’artista nos a explicat. “Escotar, sentir, espiar au son entorn sufisen tà véser pauc a pauc l’invisible deviéner compreneson. Los sens restats en esvelh permeten a l’òme de percéber l’arma de l’univèrs e la soa beutat etèrna”, çò ditz.
 
Al delà de sas exposicions en França, Espanha, Japon, Corèa del Sud e Itàlia, Cariteau expausa fòrça regularament son trabalh en Occitània: Abadiá de l’Escala Dieu (Baroniás Gasconas), Abadiá de Bèllòc (Tèrrafòrt), Temple de Cauçada (Carcin Blanc), Granièr del Capítol de Caors (Carcin Blanc). Son trabalh es present a la Galariá Bam, a la Carrièra Ramond IV a Tolosa.
 
Podètz vesitar son sit web, son blòg d’actualitat artistica e l’evocacion de sa residéncia en Japon.