Crisi en Espanha al sen del Partit Popular, que govèrna l’estat, dempuèi la detencion dijòus passat de Rodrigo Rato. Rato foguèt lo vicepresident encargat de l’economia del govèrn de José María Aznar, tanben foguèt president de la banca Bankia, en quincanèla, e director gerent del Fons Monetari Internacional (FMI). Aquel que foguèt considerat coma “lo melhor financièr del país” (segon lo banquièr Emilio Botin) es mes en examen per fraudariá fiscala, emblanquiment d’argent e desviament de bens. En 2012, lo govèrn del Partit Popular facilitèt una amenistia fiscala e Rato s’i sometèt en ensajant de  regularizar una fortuna “obtenguda dins de condicions suspèctas”, segon l’Agéncia Tributària Espanhòla.
 
Lo politician popular foguèt detengut pendent qualques oras après assisir al furn de son ostal, a la demanda del ministèri public, e ara espèra d’èsser cridat pel jutge.
 
 
Nèga que son patromòni siá de 27 milions d’èuros
 
Rodrigo Rato a negat als mèdias que son patrimòni siá de 27 milions d’èuros, contràriament a çò qu’a afirmat lo jornal El Mundo, que ditz qu’a accedit a l’informacion de l’Agéncia Tributària Espanhòla. “Lo mieu patrimòni es fòrça mai reduch. Los 27 son una chifra pas brica reala que ten pas”, çò diguèt sens precisar quala es la chifra reala del sieu patrimòni.
 
Tanben neguèt aver fraudat 1,4 milion d’èuros a l’impòst sul revengut de 2012 e 2013. Segon el, aquelas annadas “practicament” trabalhèt pas. “Perque aquò foguèsse cèrt, m’auriá calgut contunhar de trabalhar los dos exercicis e, dempuèi lo mes de mai de 2012, quand quitèri Bankia, tornèri pas trabalhar aquel an ni en 2013”, çò a afirmat. Almens, totun, a reconegut qu’es proprietari de la societat VivaWay e que tanben a una societat amb participacion del 44% en una ostalariá de Berlin.
 
 
Lo jutge a fach gelar los comptes de Rodrigo Rato
 
Lo jutge en carga de l’afar a ordenat a las entitats financièras de blocar totes los comptes e totes los produches bancaris que sián en nom de l’èx-vicepresident del govèrn d’Aznar. Rato pòt pas accedir als depauses, fonzes d’investiment e pensions, comptes corrents e quin que siá autre produch financièr qu’aja. Tanben li gèlan l’accès a las societats restacadas a el. Lo jutge Antonio Serrano a requerit maitot l’informacion istorica dels movements d’aqueles comptes.
 
 
 
Rajoy reconeis que l’afar afècta lo Partit Popular
 
Lo president del govèrn espanhòl, Mariano Rajoy, diguèt pas res fins a dissabte, quand reconeguèt que l’afar afècta “mai que mai” lo Partit Popular, pr’amor que Rato èra estat “un dels actors mai importants” del partit. Volguèt dire pas res de mai sus l’afar e remandèt los jornalistas a las explicacions que dirà deman lo director de l’Agéncia Tributària dins lo Congrès dels Deputats.
 
D’un autre costat, Rajoy insistiguèt que l’afar aviá pas res a veire amb l’amnestia fiscala que faguèt lo sieu govèrn en 2012. En de declaracions a divèrses mèdias abans un rescontre public, lo president espanhòl diguèt que totes sèm egals davant la lei e qu’a partir d’ara seràn “atentius de çò ne diga l’Agéncia Tributària, lo ministèri public e la justícia”; e mai soslinhèt que lo trabalh del govèrn èra de “garentir l’independéncia, coma o a totjorn fach”.
 
E mai se lo Partit Popular es fòrça tocat per mai d’un afar de corrupcion, es lo primièr còp que Rajoy mòstra son checpic als mèdias.
 
 
A plan lèu, lo gangstèr
 
Fa mens d’un an, Rodrigo Rato compareguèt al Parlament de Catalonha dins una comission d’enquèsta sus las cartas de crèdit secretas, que las avián los conselhièrs de la banca que Rato n’èra president. Dins aquela compareissença, lo deputat catalan de la CUP, David Fernàndez, faguèt una frapanta intervencion:
 
“Avètz paur? D’o perdre tot coma s’es passat en cò de milions de familhas, que lo mond n’ajan pas son confle. Avètz paur? Nos veirem dins l’infèrn. Lo vòstre infèrn es la nòstra esperança, es la carrièra. A plan lèu, lo gangstèr. Fòra la màfia!”, çò diguèt Fernàndez mentre que mostrava sa sabata a Rato, coma “fan en Iraq coma simbòl d’umiliacion e mesprètz al poder del poder”. Lo deputat de la CUP poguèt a pena acabar l’intervencion perque la presidenta de la comission, la deputada del Partit Popular, Dolors Montserrat, lo talhèt en disent qu’èra fòra temps.