Lo 26 de junh passat, Nabil, un jove de 26 ans, foguèt tuat a Milhau (Causse de Larzac) per la bala d’un policièr de la Brigada Anticriminalitat (BAC). La brigada es criticada dempuèi longtemps e i a ja mai d’un collectiu “antiBAC”.

La setmana passada los “antiBAC” manifestèron amb la familha e los amics de la victima. La protèsta aguèt lo sosten de nombroses milhaveses. Lo diluns 9 de julhet passat, lo collectiu “antiBAC” manifestèt tornarmai pel centre de Milhau, de l’ostal de la comuna al comissariat. Los manifestants demandavan, un còp mai, la vertat sus las circonstàncias de la mòrt del jove. “Nos an contat de multiplas versions dins los jorns qu’an seguit lo defalhiment de Nabil, mas se sap pas encara çò que s’es passat vertadièrament”, çò explica una manifestanta a La Dépêche.
 
Lo collectiu farà lo ponch aquesta dimenjada per considerar la contunhacion del movement.
 
Entre las revendicacions, i a tanben la demission del comandant de polícia e del procuraire de Rodés, la dissolucion de la BAC e una posicion clara de la part de la municipalitat. Lo cònsol de Milhau, Guy Durand, assegurèt arunan que demandariá una enquèsta concernissent los metòdes de cèrts foncionaris de polícia, mas al jorn d’uèi, lo dorsièr es enterrat.