La remaira nòrd-catalana, Maria Geoffroy, ganhèt la medalha d’aur del campionat de França de rem la dimenjada passada a Macon (França). Per o celebrar naut del pòdi, Geoffroy a levat una impausanta estelada, lo drapèl independentista catalan.

La remaira representa l’esquipa Perpignan Aviron 66, que participa amb un malhòt ornat del drapèl catalan, e es escolana de La Bressola, l’equivalent nòrd-catalan de las Calandretas.
 
Geoffroy es sòrre d’un èx-campion de rem, Francisco Geoffroy, e es ja la segonda annada que participa al nivèl mai naut del campionat francés. S’emportèt la victòria dimenge passat en s’impausar regdament a la finala fàcia a las siás doas maximalas concurrentas. L’esquipa catalana a atengut tres títols de campions de l’Estat francés.
 
Aquel meteis dimenge, lo venceire del semimaraton dels Sky Games aguèt pas drech a medalha perque participava amb Catalonha.
 
Es lo primièr còp qu’un esportiu exibís un simbòl independentista en un campionat oficial de l’estat francés. Lo gèst s’es produsit pauc après que la sud-catalana Núria Picas venguèsse campiona del mond del maraton de montanha en tot arribar amb l’estelada dins las mans.