Lo partit europèu apièja lo caractèr plebiscitari del 27-S en Catalonha, lo procès de patz al Bascoat,  la reünificacion de Bretanha e l’autonomia dels sorabs · La formacion de partits autonomistas e independentistas incorpòra de novèls membres en Lombardia, Transilvània, Tràcia Occidentala, Yorkshire e Naut Karabagh.

L’Aliança Liura Europèa (ALE) considèra qu’Euròpa “es a anar enrèire”, per la pèca de las “tendéncias recentralizairas dels estats membres” de l’UE, un fach que s’acompanha  d’un “discors politic de las institucions europèas qu’evoluciona de la subsidiarietat cap al refortiment de las competéncias dels estats membres”, causa qu’entraïna una “menaça per l’avenir d’Euròpa”. Es la conclusion qu’aquel partit europèu —format de partits autonomistas e independentistas de tota Euròpa— trai de l’analisi dels eveniments de fòrça estats de l’UE, durant l’amassada generala qu’organizèt a Budyšin (o Bautzen, en Lusàcia) entre lo 16 e lo 18 d’abril.

L’ALE considèra qu’aquelas tendéncias s’obsèrvan en Espanha, amb lo blocatge de quina iniciativa que siá per qu’aja luòc un referendum d’independéncia en Catalonha e, al Bascoat, amb la mantenença d’Arnaldo Otegi en preson, mas tanben dins d’autres estats. França “blòca quina reforma institucionala que siá votada amb de netas majoritats a l’Assemblada de Corsega”, “diluís las regions occitanas, savoiarda, basca e catalana, refusa de reünificar las cinc partidas istoricas de Bretanha i abolís la region d’Alsàcia”. Itàlia “contunha de vojar los estatuts d’autonomia existents” e lo Reialme Unit “a rompudas sas promessas sus la devolucion” que faguèt en favor d’Escòcia per que capitèsse mal lo referendum sus l’independéncia.

Lo partit europèu denóncia tanben “l’illegalizacion en Polonha de tota organizacion que pòrte l’epitèt «silesian» dins son nom” e critica que “Bulgaria e Grècia [...] contunhen d’ignorar lors minoritats”. L’ALE critica tanben Finlàndia per impulsar pas “de mesuras activas que garentiscan la subrevivença de la lenga suedesa” e Romania per “considerar las ambicions autonomistas coma una menaça per la seguretat nacionala”.


Sosten al caractèr plebiscitari del 27-S

Durant l’amassada generala, l’ALE aprovèt una declaracion presentada per ÈRC (Esquèrra Republicana de Catalonha): lo partit europèu apièja lo procès sobeiranista de Catalonha e se regaudís del caractèr plebiscitari de las eleccions del 27 de setembre.

Lo partit europèu tanben aprovèt de declaracions de sosten a la reünificacion de Bretanha, a l’autonomia dels sorabs de Lusàcia e al procès de patz al Bascoat.


Quatre novèls membres observadors de l’ALE

L’ALE a incorporat quatre novèls membres observadors. Se tracta de Prò Lombardia Independéncia (independentistas lombards), del Partit Popular Ongrés de Transilvània (federalistas ongreses de Transilvània), del Partit de l’Amistat, l’Egalitat e la Patz (comunautat turca de Tràcia Occidentala, en Grècia) e de Yorkshire First (Yorkshire d’en primièr, regionalistas autonomistas de Yorkshire, en Anglatèrra).

Egalament, lo Blòc Nacionalista Valencian a passat de membre observador a membre de plen drech. Es lo quatren partit dels Païses Catalans a far partida de l’ALE, amb ÈRC, los malhorquins del PSM e los nòrd-catalans d’Unitat Catalana.

L’ALE tanben a estrenada una novèla categoria —la de membres associats, per los partits de païses exteriors a l’UE— que i es estat admés lo Partit Democratic d’Artsakh, del Naut Karabagh.
 

---

Aquesta nòva es adaptada de Nationalia, amb qui Jornalet a un acòrdi de cooperacion.