La chifra dels mòrts aumenta pel tèrratrem en Nepal e Índia que s’es passat dimenge 25 d’abril. I a mai de 2 200 mòrts e mai de 4 700 ferits segon l’armada nepalesa, la polícia e divèrses mèdias. Son de chifras qu’encara pòdon aumentar.
 
Lo govèrn de Nepal a declarat l’estat d’emergéncia dins las zònas afectadas e a sollicitat d’assisténcia umanitària, segon la BBC. L’epicentre del fòrt sisme, qu’es estat de 7,8 gras a l’escala de Richter, s’es situat entre Katmandó e Pokhara. Lo tremolament s’es sentit fins a las vilas indianas de Nòva Delhi o Calcuta e mai a la frontièra amb Paquistan.

Una fòrta replica del sisme s’es producha dimenge de matin, lo 26 d'abril, amb una magnitud 6,7 gras sus l'escala de Richter.
 
A la capitala de Nepal, Katmandó, d’edificis se son escrancats. Entre las construccions afectadas i a la famosa Tor de Dharahara, del sègle XIX, reconeguda per son importància arquitecturala per l’UNÈSCO: ailà un cinquantenat de personas son restadas blocadas sota los tarcums. 
 
Al principal espital de Katmandó son arribats de centenats de ferits. Los ciutadans ferits espèran per carrièras las possiblas novèlas replicas del sisme. Ja se n’es enregistrat una dotzena, que quatre d’entre elas èran superioras als 5 gras.
 
 
Granda avalanca a Chomolangma
 
Lo terratrem tanben a provocat d’avalancas dins la zòna de Chomolangma (lo Mont Everest). Aquelas avalancas aurián submergit qualques campaments ocupats per d’expedicions chinesas e japonesas. Un pòrtavotz del Ministèri del Torisme nepalés a confirmat la mòrt de dètz personas. Puèi la chifra a aumentat fins a 17 mòrts almens.