Dempuèi dissabte lo public pòt vesitar la replica de la Balma Chauvet, dins la comuna de Valon-Pont de l’Arc (Bas Vivarés). Es una còpia fòrça fidèla, al millimètre près, de la balma originala. Aqueste sit d’art preïstoric es un dels pus ancians d’Euròpa.

Lo director d’esplecha de la còpia de la Balma Chauvet, Antoine Deudon, a declarat: “S’est vendut totas las plaças per la jornada. Esperam entre 2 200 e 3 000 vesitaires e totes an reservat d’avança las bilhetas sus Internet.”
 
Lo 10 d’abril passat, ja lo president de l’estat francés, François Hollande, s’èra autrejat lo privilègi d’inaugurar la replica de la balma dins una ceremònia d’accès limitat.
 
La balma vertadièra e originària, la descobriguèron en 1994 tres espeleològs amators: Jean-Marc Chauvet, Éliette Brunel e Christian Hilaire. Rèsta inaccessibla al public per fin d’èsser melhor protegida.
 
Es un sit arqueologic fòrça important que l’UNÈSCO l’a enregistrat dins sa lista del “patrimòni mondial”. D’efièch, la Balma Chauvet presenta un milierat de pinturas e gravaduras de nauta qualitat artistica, dont 420 representan d’animals. Fa partida dels sits artistics pus ancians d’Euròpa. S’estima que coneguèt doas fasas d’ocupacion: una a l’epòca de l’art aurinhatian (de 33 000 a 29 000 ans abans lo present) e la segonda, pus tardiva, al temps de l’art gravetian (de 27 000 a 24 000 ans abans lo present).