Un estudi estatsunidenc indusís que, un còp cercat dens los genòmas deus umans, gorillas e chimpanzés, es en çò deu nòste ajòu comun qui remonta a 10 milions d’annadas qu’emergí la capacitat d’ingerir alcòl —hòrt precisament de metabolizar l’etanòl—. Aquò non vòu pas díser qu’aqueth primat de luenh sabèva brutlar l’armanhac, simplament que se devó méter a minjar fruta mei que madura. Los cercaires supausan que lo nòste arrèrarrèrarrèrpapet seré devarat deus arbes, qu’auré començat a consumar frutas qui poirivan au sòu e que los sos gèns se devón adaptar ad aqueth navèth regim. La genetica non ditz pas (enqüèra) si estó en un moment de hartèra que lo monard avó l’idèa de viéner bipède.
 
 
 
 
LT
 
 
________________________
CARRIGAN, Matthew E., et al., 1r de deceme de 2014, “Hominids adapted to metabolize ethanol long before human-directed fermentation”, Proceedings of the National Academy of Sciences (PNAS)