Lo refús del provesiment en cassacion d’Yvan Colonna, ièr dimècres, condemna lo militant còrs definitivament a perpetuitat, ja qu’es acusat de l’assassinat del prefècte de Corsega Claude Érignac. Lo sieu avocat va apelar a la Cort Europèa dels Dreches Umans.

Lo tribunal de cassacion anoncièt, ièr dimècres, lo refús del provesiment d’Yvan Colonna, çò que lo condemna definitivament a la reclusion a perpetuitat, essent acusat de l’assassinat del prefècte de Corsega Claude Erignac.
 
Fa dos ans, la nauta jurisdiccion anullèt la siá primièra condemnacion per un vici de procedura.
 
Yvan Colonna foguèt jutjat un tresen còp lo 20 de junh de 2011, e foguèt condemnat tornarmai a perpetuitat per l’assassinat de Claude Erignac, lo 6 de febrièr de 1998 a Aiacciu, e per l’atac qualques meses abans de la gendarmariá de Pietrosella (Corsega), ont l’arma del crime foguèt estada amagada.
 
Lo pastor còrs, que clama totjorn la siá innocéncia, es en preson dempuèi la fin d’agost de 2011 a Tolon (Tolonenc), après passar uèch ans a Fresnes (Illa de França).
 
Al moment de l’audiéncia de cassacion del 21 de junh, lo sieu avocat, Mèstre Patrice Spinosi, aviá litigat sièis motius de cassacion, del temps que lo parquet general recomandava un refús del provesiment.
 
Mèstre Spinosi aviá prevengut que se lo Tribunal de cassacion se refermava en la condemnacion de Colonna, apelariá a la Cort Europèa dels Dreches Umans (CÈDU), una procedura que poiriá prene “quatre a cinc ans”, totun.