Ven de morir lo 29 d’abril l’entrepreneire François Michelin, dins la vila ont nasquèt farà lèu 89 ans, Clarmont-Ferrand, la capitala d’Auvèrnhe.

Èra lo felen d’Édouard Michelin (1859-1940) que, cap d’entrepresa amb son fraire André, aviá aguda l’idèa de crear de pneumatics desmontables aplicables a las bicicletas, puèi als coches.  Avián ansin fondada la societat Michelin en 1889, qu’influencièt prigondament non sonque l’indústria automobila mas tanben l’aeronautica: los centenats d’avions Bréguet-Michelin que la societat Michelin los construguèt participèron a la victòria francesa de 1918.

Es jos la direccion de François Michelin, de 1955 enlà, d’en primièr coma cogerent, puèi coma sol gerent en 1959, que lo grop Michelin s’espandiguèt especialament. D’efièch, desvolopèron lo pneumatic radial, que permetèt a la societat de venir lo primièr fabricant mondial, e conquestèron lo mercat estatsunidenc dins los ans 1980 après rescaptar lo manufacturièr Uniroyal Goodrich. En 1999, François Michelin se retirèt e daissèt la direccion de la societat familiala a son filh Édouard.

Èra intrat dins l’entrepresa d’una manièra atipica, que comencèt son activitat coma simple obrièr, jos una falsa identitat, en 1951. Catolic fervorós, encarnava lo paternalisme industrial pel qual lo critiquèron de còps.

Sa vida patiguèt d’aspèctes tragics. Dins sos sièis ans, en 1932, foguèt orfanèl de son paire Étienne, pilòt mòrt dins un accident d’avion, e perdèt sa maire quatre ans puèi. En mai de 2006, son filh e successor Édouard defuntèt dins lo naufragi d’un batèl de pesca.

Tanben universalament coneguda per sa mascòta Bibendum e per una guida gastronomica, la societat Michelin, que François la diriguèt durant 44 ans, representa l’esperit d’innovacion occitan.