Françoise Balon es una artista occitana nascuda a París de paire guadalopenc e de maire peiregòrda. Après d’annadas a compaginar de libres, de revistas e de documents... e a cantar de gospèl, en 1998 decidiguèt de se consagrar a la tapissariá contemporanèa de naut nivèl.
 
“Impressionista” de la tapissariá, inspirada per un païsatge, una pèira, un arbre... ela cèrca de traduire una emocion per la matèria, la color e la forma. Emplega de materials divèrses coma la lana, la ràfia, los sintetics, lo cambe, de fils de coire o de fèrre, etcetèra, e amb tot aquò Balon teis en tres dimensions.
 
A participat a de nombrosas exposicions e a mai a obtengut lo 2d prèmi del departament de Tarn al Salon de la Davalada d’Albi per sa tapissariá entitolada Pépites (Pepitas).
 
Dempuèi 2012 es installada a Albi e fa partida de l’associacion dels Amics de las Arts d’Albi en tot s’iniciar la pintura acrilica.
 
Pendent tot aqueste mes de mai, sas tapissariás e sas pinturas s’expausan al centre occitan Lo Grífol d’Albi.