La libertat de premsa a davalat en 2015 segon un classament elaborat per Reportèrs sens Frontièras, que permet de conéisser la situacion dins 180 païses. Lo rapòrt analisa lo pluralisme e l’independéncia dels mèdias, la seguretat e lo respècte de la libertat dels jornalistas.
 
Dempuèi qualques annadas tres païses nordics son los que gaudisson mai de la libertat de premsa: Finlàndia, Norvègia e Danemarc.
 
Tocant Occitània, Itàlia es l’estat amb mens de libertat de premsa, a la plaça 73, seguida de França qu’es a la plaça 38 e qu’es superada per Espanha a la plaça 33. Lo rapòrt publica pas de donadas tocant Mónegue. Segon aqueste rapòrt, de païses coma Namibia (plaça 17), Ghana (plaça 22) o Surinam (plaça 29) gaudisson de mai de libertat de premsa qu’en cò nòstre.
 
En dessota dels estats que tòcan Occitània, podèm trobar los Estats Units (plaça 49) o Japon (plaça 61). A la coa, los païses amb mens de libertat de premsa son Turcmenistan, la Corèa del Nòrd e Eritrèa.
 
Reportèrs sens Frontièras soslinha que pendent lo darrièr an la libertat de premsa dins lo Mond entièr s’es vista “afectada pels conflictes, la menaça creissenta dels actors non estatals e las agressions comesas pendent las manifestacions o la crisi economica e financièra”. Dos païses sus tres, dels 180 del classament, presentan de resultats piègers qu’en 2014. L’indèx d’atacs contra la libertat d’informacion dins lo Mond a aumentat d’un 8% a respècte de 2013 e gaireben d’un 10% a respècte de 2012, segon l’organizacion.