Ièr, dimècres, coïncidissiá l’anonci de las reduccions budgetàrias e socialas de Mariano Rajoy amb l’arribada a Madrid de la nomenada “Marcha Negra” dels menièrs. Los menièrs arribèron de matinada e foguèron recebuts per mai de 200 000 personas que lor mostravan la lor solidaritat.

Ièr, dimècres de matin, la marcha de protèsta dels menièrs, provenent de divèrses endreches d’Espanha, arribava davant lo Ministèri de l’Indústria ont los esperavan un fum de policièrs armats. Sus aquela scèna i aguèt d’afrontaments entre los manifestants e los agents que los recebèron amb de balas de goma. Los menièrs respondèron amb de petards e de pèiras, del temps que cridavan “l’enemic es dedins” e “sèm pas de terroristas, sèm de menièrs”.
 
Fins a aquel moment, la manifestacion s’èra debanada tranquillament per las carrièras de Madrid. Dobrissián la marcha quatre colomnas de menièrs d’Astúrias, de Castelha, de Leon e d’Aragon.
 
L’arribada de la “Marcha Negra” a Madrid foguèt un moment emotiu perque los menièrs esperavan pas que de centenats de milièrs de personas los recebèsson.
 
Los menièrs an capitat, amb aquela marcha, que se veja mai lo conflicte del carbon e la viabilitat de las minas. Son de questions que duran dempuèi d’annadas.
 
L’origina del conflicte se basa sul fach que lo govèrn de Madrid, en mans del conservador PP, a redusit las ajudas al sector menièr d’un biais talament drastic que lo barrament d’entrepresas menièras, previst per 2018, acompanhat d’un plan de formacion e de replaçament dels trabalhadors, es restat letra mòrta; e lo barrament serà immediat. La reduccion budgetària generala es de 70% de las quantitats pachadas d’en primièr. En total, qualques 5000 personas poirián pèrdre l’emplec se las entrepresas menièras barrèsson, e sens un plan seriós de replaçament, amb de consequéncias catastroficas per l’economia d’un país sens alternativas industrialas.