Un nòu atac del govèrn espanhòl contra lo sistèma educatiu catalan e aranés a entraïnat una reaccion unitària en Catalonha e Aran, ont totes los partits politics del Parlament catalan, levat lo Partit Popular e Ciutadans, an afrontat lo govèrn espanhòl e son ministre de l’educacion, José Ignacio Wert. Aqueste còp, lo Ministèri espanhòl de l’Educacion a presentat un recors en justícia contra las preïnscripcions a las escòlas publicas de Catalonha e Aran. Lo govèrn de Rajoy vòl que se dobrisca un periòde addicional per informar las familhas qu’an drech d’exigir l’espanhòl coma lenga veïculara. En mai d’aquò, lo ministèri a demandat a la justícia d’agir per far efectiu “lo drech” dels escolans catalans a recebre almens un 25% de las leiçons en lenga espanhòla. A l’ora d’ara, lo sistèma educatiu garentís la plena coneissença e lo plen mestritge de l’espanhòl dins un sistèma d’immersion lingüistica qu’en Aran se fa en occitan e en Catalonha en catalan.
 
Lo ministre Wert volguèt esclarzir que sa mesura invalida pas las immatriculacions ja fachas. Segon lo ministre espanhòl, çò que lo govèrn espanhòl cèrca de far es de dobrir un “periòde addicional” per suggerir a las familhas la possibilitat de demandar l’escolarizacion en lenga espanhòla. Mas las intencions de Wert son conegudas dempuèi longtemps, amb sa nòva Lei de l’educacion que cercava de metre l’occitan e lo catalan al nivèl de lengas facultativas, e sas claras intencions d’“espanholizar los enfants catalans”.

 
Reaccion del govèrn de Catalonha
 
La conselhièra de l’educacion de la Generalitat de Catalonha, Irene Rigau, diguèt qu’administrativament es “una peguesa” e politicament “una ofensa” e, per tant, anoncièt que presentariá d’allegacions abans dètz jorns. Rigau assegurèt tanben que lo procès d’immatriculacion se desvolopariá amb normalitat entre los 8 e 12 de junh, coma èra ja previst. En mai d’aquò, Rigau afirmèt qu’es convencuda que “los tribunals donaràn rason al govèrn” de Catalonha, e que “se poirà manténer lo modèl d’immersion lingüistica en Catalonha”, atanben, esitèt pas a assegurar que “l’intencion politica de fons del Ministèri de l’Educacion es de far desaparéisser la lenga catalana per que s’emplegue solament dins l’encastre de la familha”. Aital o considèra tanben lo president de la Generalitat, Artur Mas, qu’en una session del Parlament acusèt lo Partit Popular d’“ensajar de cambiar lo modèl educatiu catalan a travèrs dels tribunals perque amb las urnas capita mal”.
 
 
Lo debat politic
 
Levat del Partit Popular e de Ciutadans, totes los partits del Parlament de Catalonha an sostengut Rigau. CIU, ÈRC, lo PSC, ICV-EUIA e la CUP considèran qu’es un atac politic del govèrn espanhòl contra lo modèl d’immersion e un assag de “judiciarizar” l’escòla. Tanben encoratjan la comunautat eductiva a se mobilizar.
 
 
La societat civila
 
Al delà del debat politic, una bona partida de la societat civila e de la comunautat educativa se manifestèt en favor del modèl d’immersion lingüistica.