L’associacion De Main en Main presentèt dijòus passat la “tinda”, la nòva moneda locala de Bearn, que se metrà oficialament en circulacion lo 28 de junh que ven. “Que seré lo parat de’s har conéisher en dehòra deus hialats militants", çò diguèt a La Setmana una sòcia de l’associacion De Main en Main, que pòrta lo projècte.
 
Los bilhets son concebuts a partir de 12 dessenhs seleccionats dins un concors. Sièis dessenhs son d’escolans bearneses per lo rècto, e sièis d’adultes per lo vèrso. E mai, suls bilhets d’una e de doas tindas, i a un “espaci de libertat d’expression” ont los usatgièrs escriuràn de frasas “militantas”. I a cinc classas de bilhets: d’1, 2, 5, 10, 20 e 50 tindas, que se pòdon escambiar per d’èuros amb valor d’1 per 1.
 
La tòca d’aquela moneda es de dispausar d’una aisina que favorisca una economia mai respectuosa de las personas e de l’environament, que favorisca los escambis locals, que desvolope la solidaritat, qu’impulse l’usatge de la lenga occitana e que sostenga los projèctes locals d’interès comunautari, entretant. Per ara dins l’annuari i a un cinquantenat de prestataris e de professionals de Pau o d’Auloron. Per emplegar aquela nòva moneda cal aderir a l’associacion De Main en Main, qu’espèra que l’usatge de la tinda s’implantarà progressivament e que las entrepresas e los particulars seràn de mai en mai interessats per l’emplegar dins lo circuit del comèrci local.
 
Los nòstres confraires de La Setmana èran a la presentacion e ne prepausan un reportatge amb d’àudio.