Lo 23 de mai que ven se tendràn dins lo Mond entièr de marchas de protèsta contra Monsanto, la societat transnacionala que fa d’organismes geneticament modificats (OGM) e que s’impausa de mai en mai sus tota la planeta. En mai de Pèirahorada (Shalòssa), ont Monsanto a una usina, i aurà de protèstas a Bordèu, Niça, Clarmont-Ferrand, Baiona, Marselha, Montpelhièr, Tolosa e Nimes, segon çò que rapòrta lo sit Combat Monsanto.
 
Los opausants a Monsanto revendican una alimentacion sana per totes e dison que i a “pro d’empoisonament”. Dins aquel sens exigisson la presa en compte dels estudis sus las consequéncias toxicas dels OGM, dels pesticidas e de las ormònas de creissença sus la santat e l’environament. Lançada en 2013 pel movement Occupy, la Marcha Mondiala contra Monsanto es una dinamica ciutadana, autogerida pels grops locals dins un esperit de convergéncia. Dins aqueles recampaments, se profecharà de l’ocasion per manifestar tanben contra lo tractat transatlantic de liure escambi conegut amb las siglas de TTIP o TAFTA.
 
 
Interdich en Ongria
 
L’estrategia de la societat Monsanto, que n’es accionària la familha Rockefeller, es que las plantas que grelhan de lors granas, pollinizen d’autras plantas normalas e que las contaminen, puèi Monsanto exigís los brevets correspondents. Es a causa d’aquò que de païses coma Ongria an enebida l’intrada e la comercializacion de las granas que las produtz la societat Monsanto e a declarat qu’es la responsabilitat dels quites comerçants de susvelhar que las granas que distribuisson sián pas de transgenicas. Per tant, quand los ongreses tròban de plantas contagiadas, las crèman.