Eth tèrratrem que flagelèc Nepal eth 25 d’abriu passat a causat ua pèrda colossau de vides e de proprietats, e tanben de fòrça infrastructures degalhades e de bèri monuments deth Patrimòni dera Umanitat d’immensa valor istorica e arqueologica. Enquiath moment s’an trapat mès de 6000 persones mòrtes e lèu de 17 000 persones herides, çò que da era idèa dera magnitud d’aguesta tragèdia umana que viu eth pòble de Nepal.
 
Eth govèrn de Nepal, de manèra immediata, s’ei centrat principauments en sauvament de persones, sauvar vides e era compilacion d’informacion entà coordenar es trabalhs d’emergéncia de manèra eficaça e oportuna deuant es efèits devastaires deth tèrratrem.
 
Es estats membres des Nacions Unides, persones e organizacions umanitàries realizen contribucions volontàries tant en argent coma en espècies, entad açò s’ei constituit eth Hons d’Ajuda entàs Desastres deth Prumèr Ministre (PMDRF) entà poder canalizar aqueres ajudes e contribucions.
 
Aqueres contribucions financères, tanben se pòden depausar en compde corrent d’ajuda a:
 
AJUDA DAMNATJATS TÈRRATREM NEPAL
IBAN: ES66 2100 0920 3002 0031 8805
CAIXABANK, S.A- LA CAIXA
 
Eth govèrn de Nepal arregraís tota era cooperacion e es mesures de sauvament e sosten de secors, volontàries e espontanèes, que son hornides pera comunautat internacionau en moment d’aguesta grana tragèdia nacionau.
 
Eth govèrn de Nepal a decidit qu’es govèrns estrangèrs e es organizacions internacionaus poguen agranir era ajuda umanitària en tot contactar eth Ministèri des Ahèrs Exteriors deth govèrn de Nepal, a trauèrs des ambaishades e consolats de Nepal e tanben damb era ajuda deth Burèu deth Coordenaire Resident des Nacions Unides en Katmandó.
 
Es seguents materiaus d’ajuda son fòrça urgents entath trabalh immediat: tendes de campanha (petites, mejanes, granes), matalassi, mantes, purificadors d’aigua, kits de sanejament, utensilis. Son necessaris es esquipaments medicaus de cirurgian ortopedic, anestesista, neurològ, paramètges e cirurgian en generau.
 
Entà viatjar en Nepal, a toti es membres des còlhes estrangères de sauvament, se recomane èster en possession d’un passapòrt valid damb eth visat d’entrada corresponent.
 
“Des deth Conselh Generau d’Aran lamentam es pèrdes umanes e materiaus qu’a patit Nepal e manifestam eth nòste mès absolut supòrt, en tot comprometer-mos a hèr era maximala difusion e sensibilizacion entà collaborar ena obtencion de finançament que les ajude a restablir era normalitat”, çò a manifestat eth vicesindic d’Aran, Luís Carlos Medina.
 
 
 
 
CGA