Los anars-tornars a París an començat. Lo mond de Bake Bidea bastisson lo programa de la conferéncia umanitària de la patz que se debanarà l’11 de junh dins la capitala francesa. S’agirà non solament d’explicar çò que s’es debanat de nòu dempuèi lo forum de Baiona (fòto Bake Bidea) mas encara de far un estat dels lòcs sus las repercussions del conflicte basc a l’escala internacionala. Los enjòcs son multiples pels organismes que causisson de s’implicar dins lo procès de patz. Se cal primièr clinar sul sòrt dels presonièrs, las condicions de lor aprochament o quitament de lor liberacion condicionala.
 
Cal encara ensajar de crear un espaci de convèrsas entre las diferentas victimas del conflicte... que sián de familhas de victimas d’atemptats o encara de victimas de la repression policièra. Cal subretot ensajar de far comprene que i a de victimas dels dos costats. D’unas refusan de cambiar de posicion. D’autras, qu’an fait lo dòl, ne vòlon pas pus parlar. D’autras, encara minoritàrias, accèptan d’encontrar las victimas “de l’autre costat”. Quitament se pòrta una patz fragila, l’Irlanda del Nòrd a fòrça ganhat amb l’Acòrd del Divendres Sant. Es un precedent interessant pels basques que se’n pòdon inspirar tot en adaptant los metòdes a lor terren e a lor istòria.
 
Tornatz trobar l’entrevista de Maitena Thicoipe de Bake Bidea sus La Setmana.
 
 
 
 
Clamenç Pech