La tèrra tornèt tremolar ièr de matin en Nepal. Lo tèrratrem es estat aqueste còp de 7,3 gras (7,4 segon cèrtas fonts); a castigat lo nòrd-èst del país e a tuat mai d’un quarantenat de personas del temps que i a mai d’un milièr de ferits. Se son confirmadas de victimas mortalas a Chautara, Sindhipalchowk, Sitapaila, Tekulgunes e de quartièrs periferics de Katmandó. En Índia, ont lo tèrratrem s’es sentit amb fòrça, i a almens cinc mòrts. Segon las informacions qu’arriban, lo nombre de victimas pòt aver aumentat considerablament.
 
L’epicentre del tèrratrem se trobèt a 83 quilomètres de la capitala, al nòrd-èst del país, en tocar Chomolangma (lo Mont Everest). Lo Servici Geologic dels Estats Units (USGS) a raportat que lo tèrratrem aguèt una fòrça de 7,3 gras segon l’escala de Richter e foguèt seguit per sèt replicas superioras a 5. Lo Ministèri de l’Interior de Nepal, que rapòrta tanben a travèrs de Twitter, diguèt que lo movement sismic aviá l’epicentre entre Dolakha e Sindhupalchowk, una endrech ont moriguèron mai del tèrç de las 8000 victimas del darrièr sisme.
 
Lo tèrratrem del 25 d’abril passat aguèt una magnitud de 7,9 e, coma uèi, se sentiguèt tanben amb fòrça dins las capitalas d’Índia e Bangladèsh, çò es, Nòva Delhi e Dhaka. Aquel tèrratrem daissèt d’imatges fòrt espantants e causèt d’avalancas dins la zòna de Chomolangma, afectada tanben aqueste còp. En aquel ponch moriguèron almens 17 personas. Qualques alpinistas publiquèron sus Internet lo vidèo qu’avián enregistrat dins lo moment qu’una avalanca recobrissiá lo camp basa de la montanha mai nauta del Mond: