Almens nòu alpinistas moriguèron ièr a causa d’un laveg de nèu al massís del Mont Blanc (Arpitània), segon de fonts de la gendarmariá de nauta montanha de Chamônix (Arpitània). Demest los mòrts i a dos ciutadans alemands, dos soïsses e dos de ciutadaniá espanhòla dont un de nacionalitat catalana. Se sap pas encara l’origina dels autres alpinistas mòrts. Los mèdias locals rapòrtan que i a tanben un desenat de ferits e encara qualques desapareguts.
 
Totes fasián partida de qualques cordadas que fasián l’ascension del Mont Blanc per la Rota dels Tres Monts, es a dire, en passant per lo Mont Maudit e lo Mont Blanc de Tacul.
 
Justament sus lo pendent del Mont Maudit, a qualques 4000 mètres de nautor, l’avalanca s’es producha. Segon la ràdio Europe 1 i aviá un vintenat d’alpinistas dins l’expedicion.
 
Un dels alpinistas ferits a alertat del laveg a l’entorn de 5h30 del matin.
 
Lo ministre de l’Interior francés, Manuel Valls, se n’es anat a Chamônix.