Lo president indonesian a anonciat la fin de las restriccions pels jornalistas estrangièrs al territòri e la liberacion de cinc presonièrs politics. La decision es arribada qualques jorns abans qu’una organizacion regionala debatèsse l’intrada de l’entitat parapluèja dels independentistas papoans, que reclaman lo drech a l’autodeterminacion de la Papoa Occidentala. 

Los jornalistas estrangièrs subiràn pas mai l’accès restrench a la Papoa Occidentala e cinc presonièrs politics papós seràn liberats de la preson. O anoncièt la dimenjada passada lo president d’Indonesia, Joko Widodo Jokowi. Las doas decisions supausan una timida dobertura d’Indonesia tocant lo conflicte de la Papoa Occidentala, un territòri ont existís un conflicte violent dempuèi los ans 1960, qu’opausa los independentistas papós e l’armada indonesiana.
 
L’afar pot èsser quitament mai important qu’aquò, Jokowi a demandat tanben a la polícia e a l’armada d’Indonesia de quitar d’emplegar la repression dins la Papoa Occidentala. Segon lo president, çò que cal far, ara, es començar un dialòg amb lo pòble papó e bastir una fisança mutuala.
 
L’anóncia de Jokowi arriba solament una setmana après que desenats de manifestants papós foguèsson arrestats pendent una seguida de protèstas organizadas contra l’ocupacion indonesiana. La repression contra lo movement independentista de la part de l’armada e de la polícia indonesianas es abituala dins la Papoa Occidentala dempuèi de decennis.
 
La Papoa Occidentala èra una colònia neerlandesa, juridicament diferenta d’Indonesia —qu’aviá ja obtengut l’independéncia— pendent los ans 1950. Coma tala, deuriá aver accedit a l’autodeterminacion tota sola. Mas en 1962, los Païses Basses e Indonesia signèron un acòrdi que la Papoa Occidentala seriá annexada pels indonesians. Los independentistas papós considèran que lo pache foguèt una violacion del drech internacional, e reclaman dempuèi alavetz l’organizacion d’un referendum d’independéncia e la fin de la colonizacion indonesiana, que mena los papós a venir una minoritat dins lor país pròpri.
 
 
Batalha diplomatica per la reconeissença
 
Las mesuras de dobertura anonciadas per Jokowi arriban un pauc abans que lo Grop Fèrre de Lança Melanesian (MSG, sigla en anglés), una organizacion intergovernamentala formada per Papoa-Nòva Guinèa, Vanuatu, las Illas Salamon e Fiji, e mai lo Front de Liberacion Nacionala Canac e Socialista de la Nòva Caledònia (collectivitat francesa d’otramar), debata lo 21 de mai que ven l’intrada d’una organizacion papó coma membre nòu.
 
En febrièr de 2015, lo Movement Unit de Desliurança de la Papoa Occidentala (ULMWP, sigla en anglés) demandèt l’intrada a l’MSG. L’ULMWP es una organizacion que cobrís los independentistas papós, e lo fach d’èsser acceptats a l’MSG seriá per eles una victòria sens precedents: poirián comptar amb lo sosten diplomatic de divèrses membres de l’ÒNU dins lor lucha per l’autodeterminacion de la Papoa Occidentala.
 
Lo pòrtavotz de l’ULMWP, Benny Wenda, considèra que las novetats anonciadas per Jokowi e la vesita que lo president indonesian fa aquestes jorns en Papoa-Nòva Guinèa fan partida d’un enssag de la part de Jakarta que l’MSG quite la candidatura dels independentistas papós.
 
 

 

---

Aquesta nòva es adaptada de Nationalia amb qui Jornalet a un acòrdi de cooperacion