Los usatgièrs gascons de Twitter auràn benlèu remarcat que, dempuèi diluns passat, se pòt publicar d’etiquetas coma #in·hèrn o #des·har. Fins ara, quand se publicava d’etiquetas amb aquel ponch interior (·) caracteristic del gascon, lo mot se partissiá per aquel signe, en dos mots, e l’etiqueta perdiá sa valor e sa foncionalitat.
 
Mas desenant, l’intregracion del ponch interior es possibla gràcias a una campanha qu’an fach en Catalonha. Los catalans an revendicat longtemps l’acceptacion d’aquel simbòl, emplegat dins la nòstra lenga sòrre per lo grop de caractèrs l·l (aquel grop catalan s’apèla l’èla geminada). Sus aquò an luchat dempuèi longtemps la plataforma “l·l.cat” e Softcatalà.