Dimars 12 de mai, la prodomiá d’Avinhon, en Comtat Venaicin, desbaucèt Marc Fazio, un òme de 50 ans, de totas sas demandas. Aquel èx-salariat de Veolia voliá sa reïntegracion dins son anciana entrepresa, ont aviá trabalhat de 1994 enlà, o qu’aquesta li bailèsse una indemnitat de 362 062 èuros.

En abril de 2013, Veolia li aviá mandat una letra de licenciament perque Sénher Fazio, salariat al servici del recobrament despuèi 2005, refusava despuèi quatre ans de copar l’aiga als clients incapables de pagar lors facturas. En plaça d’aquò, lor prepausava que demandèsson d’ajuda als servicis socials o que sollicitèsson un calendièr de pagament.

Fòrça desparièra, de segur, es la version de Veolia. Segon l’avocat de l’entrepresa, Mèstre Christian Delplancke, Sénher Fazio se voliá venjar en realitat del refús de Veolia de donar als sèt emplegats del servici de recobrament una prima mesadièra de 300 èuros, e lo salariat puèi licenciat auriá refusat un aument de 60 èuros per mes.

Eròi al servici dels necessitoses o al contrari marrit emplegat? Ara per ara, la justícia s’es decidida per la segonda ipotèsi.

Totun, Sénher Fazio a encara la possibilitat de s’apelar de la decision.