I a de simbòls nacionals que, al delai de l’impacte qu’an dins lor país, tenon una dimension grafica e artistica universala. Atal n’es de l’Union Jack britanic, que se declina dins de centenas de biaisses diferents, sus de postèrs, dins los magazines. Es un simbòl sovent ligat a la cultura pòp. Es tanben lo cas del triskell de Bretanha que coneis una celebritat grafica internacionala. En Occitània, lo nòstre simbòl nacional, la crotz occitana, malgrat que siá portaira de la nòstra identitat e que se retròbe pertot ont se traita d’un subjècte occitan, es estat lo motiu d’inspiracion de paucs artistas: en Joan-Cristòl Nicolau es un d’aqueles paucs. Confessa que la crotz nòstra es per el “una motivacion e una inspiracion”.

Es una persona plan simpatica e fòrça apassionada que m’aculhiguèt dins son ostal-talhièr de Limós (Aude). Amb la parlèra tipica del monde d’aquel parçan me contèt la naissènça de sa passion pel dessenh. L’òme es un autodidacte. Totjorn li a agradat téner un gredon dins la man. Totjorn a fait de recèrcas amb las colors, experiéncias amb las matèrias, lo lum, las tres dimensions.

Joan-Cristòl es un noirigat del País de Saut. Es una tèrra que marca e maca las gents. Pregondament impregnat per la natura e l’istòria del siu país, la crotz occitana representa aqueste ligam entre el e sa tèrra. Un jorn, li venguèt l’idèa d’associar sa passion pels arts grafics e sa passion per la crotz. Atal comencèt de fabricar relòtges amb la crotz per motiu, los 12 cèrclòts estant las 12 oras. Pauc a pauc, las siás realizacions an obtengut un bon succès local. Cada exemplar que fa es unic e diferent.
 
En mai dels relòtges, realiza d’autres objèctes amb la crotz coma tèma: tablèus, lampas, belaròias. Lo siu estile es a l’encòp figuratiu e abstrait. La crotz occitana, atal coma la representa, es una sintèsi de l’univèrs fisic e de l’univèrs mental. Se sufís de per ela: la crotz es la debuta e lo començament de tot. Es çò bon e çò mal.

Joan-Cristòl se definís a l’encòp coma escalpraire e pintraire que los sius tablèus son sovent en relèu. Raconta que “la crotz occitana es estat un biais vertadièr de transposar la passion que tèni pel miu país”. A l’apellacion d’artista li agrada mai de se definír coma un “artesan amb inspiracion”.

Del 21 de julh a 6 d’agost, presentarà qualques òbras sieunas dins l’encastre d’una exposicion d’artistas locals a Belcaire (Aude) a la Sala de las Fèstas. Lo siu sit internet es en construccion mas ja se pòt visitar.

En Joan-Cristòl Nicolau es un artista-artesan qu’a decidit de demorar los pès plantats dins la realitat nòstra e lo terrador nòstre. Non s’incriu pas dins una dralha academica. La siá libertat, qu’es tanben la nòstra, se dessenha, dins son òbra a còps de corbas, las de la nòstra polida, misteriosa e poderosa crotz. Amb son biais especial es a fargar un art autenticament occitan.




Terric Lausa
 


_____
Joan-Cristòl Nicolau +33 (0)6 50 34 45 04