Es nascuda en reaccion a la decision d’Anem Òc d’organizar la manifestacion per l’occitan a Montpelhièr. Cèrca de crear un collectiu que represente l’occitanisme al marge dels partits e de las associacions dichas representativas.

Ven d’espelir sus Internet una nòva plataforma comuna occitana. Nomenada “Marcha!, plataforma de la societat civila occitana”, s’es creada en reaccion a la decision contestada del collectiu Anem Òc d’organizar una cinquena manifestacion per l’occitan a Montpelhièr, lo 24 d’octòbre de 2015. Aital exprimisson lor “desacòrdi sus lo biais d’organizar lo movement occitan dich «oficiau»”.
 
Los iniciaires de Marcha an escrich una crida per far valer lors motivacions. Contèstan la causida de Montpelhièr coma luòc de la nòva manifestacion unitària occitana e arcastan la “manca de transparéncia” dins las presas de decision dels organizaires. Tanben es constatada “la manca d’estrategia a tèrme lòng” e la necessitat que “lei questions de fons pausadas per la situacion de l’occitan uei devon menar a de respònsas ben bastidas”.
 
En partir d’aqueste constat, lo collectiu Marcha vòl èsser un nòu esplech per “amassar largament los individús que se reconeisson coma occitans, interessats per la defensa de la lenga e de la cultura occitanas, mas pas o pas mai dins las estructuras, los organismes, los partits politics, las associacions dichas representativas en la matièra”. An creat un blòg e tanben una pagina Facebook.