Lo primièr ministre britanic, David Cameron, e la primièra ministra escocesa, Nicola Sturgeon, se trobèron divendres de matin a Edimborg en una reünion qualificada de “constructiva” e “importanta” sul transferiment de mai de poders a Escòcia. La reünion —la primièra dempuèi que Cameron obtenguèt la majoritat absoluta a las eleccions e que Sturgeon ganhèt 56 dels 59 deputats escoceses— serviguèt per que lo primièr ministre britanic reafirmèsse lo sieu “engatjament” d’engrandir l’autogovèrn d’Edimborg. Lo viceprimièr ministre escocés, John Swinney, neguèt que los independentistas aguèsson “drech” de promòure un segond referendum après l’istorica victòria del 7 de mai, e mai s’a pas barrat la pòrta a considerar aquela proposicion dins l’eleccion de 2016.
 
David Cameron diguèt a travèrs d’una fiulada sus Twitter que l’amassada amb Nicola Sturgeon foguèt “importanta” per tal de “complir l’engatjament de donar mai de poders a Escòcia”. De fonts del govèrn d’Edimborg an descrich la reünion coma “constructiva”, una afirmacion que la confirmèt puèi la quita Sturgeon a la BBC.
 
“David Cameron e ieu sèm politicament a d’ans lutz, mas, dins çò que podèm far, soi decidida a trabalhar en acòrdi amb los interèsses de las gents d’Escòcia e de la rèsta del Reialme Unit”, çò assegurèt la primièra ministra escocesa. Segon Sturgeon, Cameron “s’es engatjat” a aplicar totas las proposicions d’autogovèrn prepausadas fins ara per la comission Smith, l’organ encargat de las dessenhar, mas tanben a n’estudiar mai. “Escarti pas de far de cambiaments importants” a la proposicion de transferiment de poders, çò assegurèt David Cameron après l’amassada.
 
 
Referendum d’independéncia
 
La reünion entre Cameron e Sturgeon se debanèt al mitan d’un debat mediatic sus la possibilitat que l’SNP escocés poguèsse impulsar un segond referendum d’independéncia en seguida de la siá istorica victòria a las eleccions britanicas, mai que mai se Londres complís pas las promessas de mai de poders. Mas lo numèro dos del govèrn escocés, John Swinney , a negat qu’un nòu referendum siá sus la taula, almens a l’ora d’ara. En de declaracions a BBC Radio, Swinney a dich que l’SNP “a pas un mandat per far un segond referendum”.
 
“I a pas res, absoludament res, de las eleccions de dijòus passat que nos done drech de celebrar un segond referendum d’independéncia”, çò defendèt Swinney. “Respectam lo resultat del referendum de setembre passat, e ara sèm centrats a garentir que la decision dels escoceses de donar un sosten substancial a l’SNP servisca a obténer de poders addicionals”.
 
Lo viceprimer ministre escocés, en linha amb las declaracions d’Sturgeon pendent la campanha, diguèt qu’un nòu referendum lo caldriá comprene dins lo programa electoral de l’SNP per las eleccions escocesas de 2016, previstas pel 5 de mai. “Es un tèma que lo partit decidirà e considerarà quand se sarraràn las eleccions de 2016”, çò diguèt.