Dimars 12 de mai, aperaquí 80 parents d’escolans del quartièr montpelhierenc del Pichon Bard, essencialament de maires, acompanhats d’una cinquantena de mainatges, bandiguèron una operacion còp de ponh: bloquèron lo trafec automobil de l’Avenguda de Lodeva e interrompèron la linha 3 de tramvai. Agiguèron a la sortida de las classas de 16 oras, durant mai d’una ora, en mostrant de pancartas que portavan l’eslogan “Egalitat per totes”.

Situat a l’oèst de la vila lengadociana, lo quartièr del Pichon Bard lo coneisson per sa granda barra d’immòble caracteristica e sos problèmas socials. Despuèi lo 16 de març, los parents d’escolans se mobilizan per demandar a l’inspeccion academica e al departament d’Erau mai de mescla, e per tant mai d’egalitat, dins los establiments del primari e del segondari que ne dependon los estatjants del Pichon Bard. Jutjan las proposicions actualas insufisentas e exigisson l’organizacion d’una taula redonda per trapar de solucions duradissas.

L’accion espectaclosa del 12 de mai se passèt uèch jorns après l’ocupacion de las escòlas mairalas e elementàrias de lor quartièr, ont son escolarizats 680 escolans.

Tanben critican fòrça lo cònsol de Montpelhièr, Sénher Philippe Saurel (divèrs esquèrra), per son silenci e sa manca de reaccion.