Lo 17 de mai de 1990, l’assemblada generala de l’Organizacion Mondiala de la Santat (OMS) adoptèt una decision istorica: eliminar l’omosexualitat de la lista de las malautiás mentalas. Ièr faguèt 25 ans d’aquela data, es a dire que, fa pas gaire, cèrtas faiçons d’aimar èran consideradas coma “una conducha reprobabla e un trebol mental curable”, e las inclusián dins lo Classament Estatistic Internacional de las Malautiás e Autres Problèmas de Santat. Dempuèi, lo 17 de mai es lo Jorn Mondial contra l’Omofobia e la Transfobia: es una jornada de lucha pels dreches umans, legals e civils dels omosexuals e transsexuals dins lo Mond.
 
Cal dire que, malgrat lo pas istoric que faguèt l’OMS en 1990, l’omofobia s’es pas eradicada e contunha de fa mal dins de sectors de tota mena, tant al trabalh coma a l’escòla, en politica, dins la santat, la familha, las relacions interpersonalas, la religion, la justícia... Quitament en cò nòstre avèm de manifestacions per refusar als omosexuals lo drech de se maridar o d’adoptar d’enfants.
 
Segon l’Associacion Internacionala Lesbiana, Gai, Bissexuala, Trangenre e Intersexuala (ILGA), i a encara setanta uèch païses ont se criminaliza las relacions omosexualas. Es a dire, mai d’un tèrç dels estats del Mond considèran que l’omosexualitat es un delicte e la condemnan per la repression, per la preson e mai, dins qualques cases, per la pena de mòrt.
 
 
De 1972 a 1990
 
La decision de l’OMS de 1990 aviá agut un important precedent dos decennis abans, en 1973, quand l’Associacion de Psiquiatria Estatsunidenca (APA) decidiguèt d’eliminar l’omosexualitat del Manual de diagnostic dels trebols mentals(DSM) e plaidegèt, après una completa revision scientifica del tèma, per que se refusèsse tota legislacion discriminatòria contra los gais e las lesbianas.